بحار
عدد الرسائل : 93
العمر : 48
بتشتغل / طالب : بحار
الرد : 0
تاريخ التسجيل : 04/08/2008
 |  موضوع: @@ رباعيات صلاح جاهين كاملة @@ الجزء الثالث @  الأحد أغسطس 17, 2008 9:05 pm | |
| انا الذي عمري اشتياق في اشتيـــاق
و قطر داخل في محطة الـــــــــفراق
قصدت نبع السم وشربت ســـــــــم
من كتر شوقي وعشمي في التريـــاق
عجبي !!!
انا الذي عشت الزمن مضيعـــــــــه
بروح حزينة معفنة مضعضعــــــه
زرعتشجرة سنط لجل انجــــــرح
لقتها شعر البنت و مفرعــــــــــــه
عجبي !!
لو فيه سلام في الأرض وطمان و أمن
لو كان مفيش و لا فقر و لا خوف جبن
لو يملك الانسان مصير كل شـــــــــــئ
انا كنت اجيب للدنيا ميت ألف ابــــــــــن
عجبي !!
العشب طاطا للنسايم و نـــــــــــــــــــــخ
أخضر طري مالهش في الحســـــــن أخ
عصفور عبيط انا .. غاوي بهجه و غنا
ح انزلهنا.. و انشا لله يهبرني فــــــــخ
عجبي !!!
أوصيك يابني بالقمر و الزهـــــــــــــور
أوصيك بليل القاهرة المسحـــــــــــــور
و إن جيت في بالك .. إشتري عقد فل
لأي سمرا.. وقبري إوعك تـــــــــزور
عجبي !!!!
غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك ....تـقع
عجبي !!!
حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي !!!
يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي !!
ولدي نصحتك لما صوتي اتنبــــــــــــح
ما تخفش من جني و لا من شبـــــــــح
و ان هب فيك عفريت قتيل إسألـــــــــه
ما دافعش ليه عن نفسه يوم ما اندبح
عجبي !!
ولدي إليك بدل البالون ميت بالــــــون
انفخ وطرقع فيه علي كل لـــــــــــون
عساك تشوف بعينك مصيرالرجــــــال
المنفوخين في السترة و البنطلـــــون
عجبي !!!
خوض معركتها زي جدك ما خــــاض
صالب و قالب شفتك بامتـــــــــــعاض
هي كده...ما تنولش منها الأمـــــــل
غير بعض صد ورد ووجاع مخاض
عجبي !!!!
كام اشتغلت يا نيل في نحت الصخور
مليون بئونه و الف مليون هاــــتور
يا نيل أنا ابن حلال و من خلفتــــــك
و ليه صعيبه علي بس الأمــــــــور
عجبي !!!
منين أجيبها كلمه متألمـــــــــــــــــة
لعيبه فايره حايره و مصممــــــــــه
منين اجيبها كلمه تكون بنـــت ارض
تشفي اللي ما شافهوش كلام السمـا
عجبي !!!
أنا قلت كلمة و كان لها معنييـــــــــن
كما بطن واحده و توأمين زي وشين
لو دنيا شر.. التوأم الخير يمـــــــوت
لو دنيا خير .. الشر ح يعيش مــنين
عجبي !!
أنا اللي بالأمر المحال اغتــــــــــــوي
شفت القمر نطيت لفوق في الهـــــوا
طلته ما طلتوش إيه انا يهمنـــــــــي
و ليه .. ما دام بالنشوة قلبي ارتوي
عجبي !!
بره القزاز كان غيم و أمطار و بــــــــرق
ما يهمنيش – أنا قلت – و لا عندي فرق
غيرت رأيي بعد ساعة زمـــــــــــــــــان
و كنت في الشارع .. و في الجزمة خرق
عجبي !!!
عيني رأت مولود علي كتف أمـــــــــــه
يصرخ تهنن فيه يصرخ تضــــــــــــمه
يصرخ تقول يا بني ما تنطق كـــــــلام
ده اللي ما يتكلمش يكتر همـــــــــــــه
عجبي !!!!
يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمــــــــــا
كتم الغنا هو اللي ح يموتــــــــك
عجبي !!!
ياللي بتبحث عن إله تعــــــــــــبده
بحث الغريق عن أي شئ ينجـــده
الله جميل و عليم و رحمن رحــيم
أجمل صفاته .. وانت راح توجده
عجبي !!!
حقرا و فوق كوكب حقير محتقـــــــر
في الكون تكون دنياكو إيه يا بــــــقر
رملايه من صحرا ؟ لكين إيش تقول
و الكون بحاله جوه عقل البشــــــر
عجبي !!
لا تجبر الانسان و لا تخـــــــــيره
يكفيه ما فيه من عقل بيحيــــــره
اللي النهارده بيطلبه و يشتهــــيه
هو اللي بكره ح يشتهي يغيـــــره
عجبي !!
ياللي في حماه الشمس تلقي المــــلاذ
و ألف بكره و بكره .. في ضلوعه لاذ
مين أنت ؟ مارد ؟ رب ؟ قال لأ ده بس
انا اللي باروي القمح و اسقي الفــولاذ
عجبي !!!
غسل المسيح قدمك يا حافي القـدم
طوبي لمن كانوا عشانك خــــــــدم
صنعت لك نعليك أنا يا أخــــــــــــي
مستني إيه .. ما تقوم تدوس العدم
عجبي !!!!
البط شال عدي الجبال و البحــــــور
ياما نفسي اهج .. احج ويا الطــيور
أوصيك يا ربي لما اموت .. و النبي
ما تودنيش الجنه .. للجنه ســـــــور
عجبي !!!
طال انتظاري للربيع يرجــــــــــــــع
و الجو يدفا و الزهور تطلــــــــــــع
عاد الربيع عرمرم شبـــــــــــــــاب
إيه اللي خلاني ابتديت افــــــــزع ؟
عجبي !!!
و لو اتضنيت و فنيت وعمري انفرط
مش عاوز الجأ للحلول الوســـــــــط
و كمان شطط و جنون مانيش عــاوز
يا مين يقول لي الصح فين والغلــــط
عجبي !!
عاد الربيع كأنه طعم الحــــــــــــــــــب
و الحب نار جوه العروق بتصـــــــــب
اتمتع ازاي بيه وانا متقطـــــــــــــــع
من كتر خوفي لا في الخطيئة يطب ؟
عجبي !!
ازاي شبابنا يقوم و ياخـــــــــد دوره
من غير صراخ يئذيه و يجرح زوره
يا هلتري أحسن له يقعد ساكـــــــــت
أو ينترك و لو خرج عن طــــــوره ؟
عجبي !!!
عيني رأت عصفور ووياه ابـــــــــنه
بيحدفه في الريح و ياخده ف حضنه
نوبتين و تالت نوبه – عجبي عليهم –
كانوا سوا بيرفرفرا و يغنـــــــــوا
عجبي !!!!
احسن ما فيها العشق و المعشقــــــة
و شويتين الضحك والتريقـــــــــــــة
شفت الحية . لفيت . لقيت الألــــــــذ
تغييرها . و ده يعني التعب و الشقا
عجبي !!!
عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبي !!!
في الهو ماشي يا بهلوان إش إِش
يا فراشة منقوشة علي كل وش
شقلبت عقلي و عقلي شقلبني
و كنت باحسبني بقيت ما اندهش
عجبي !!
وقفت ساعة الصبح باغسل سناني
قالت لي شايف قوتي و لمعاني ؟
إيش تطلب اليوم مني ضحكة أسد ؟
والا ابتسامة اعلانات أمريكاني ؟
عجبي !!
الحلو يم اليم صابــــــــــح رايح
سارح في حضن الميه سابح سايح
الحلو داب في البحر , قلــــت أدوقه
وجدت لسه البحر برضك ماــــــلح
عجبي !!!
يا كل كلمة للعجب في قامــــــــــــوس
انسكلوبيديا لسان العرب أو لا لاروس
تعالوا نجدة . ده لسه في عصـــــرنا
الشمس و البحر العريض بالفـــلوس
عجبي !!!!
الموج تلول تهبط وتطلع تلــــــــــــول
يا بحر خدني الشط صاحبك ملـــــــول
و الا بلاش الشط ح اعمل به أيـــــــه
ده ريحته طحلب مهري و ام الخلــول
عجبي !!!
| |
|
اترجه
عدد الرسائل : 57
العمر : 52
بتشتغل / طالب : اخصائيه اجتماعيه
دعاء : 
مزاجي : 
الرد : 0
تاريخ التسجيل : 02/05/2008
| |
بحار
عدد الرسائل : 93
العمر : 48
بتشتغل / طالب : بحار
الرد : 0
تاريخ التسجيل : 04/08/2008
| | موضوع: رد: @@ رباعيات صلاح جاهين كاملة @@ الجزء الثالث @ الثلاثاء أغسطس 19, 2008 1:06 am | |
| السلام عليكم
انا معاكي يا اترجة ان الشط كلة كدب وخداع
وطحلب مهري وام الخلول
بس على الاقل حقيقه وواقع
لكن البحر والموج وهم كبير
الموجه تاخدك لفوق واول ما تحسي انك وصلتي لاعلى شئ
تسيبك على مافيش
ترجعي زي الاول وزياده عليه
نفس مكسورة وخوف من المجهول
وعجبي !!!!!!!!!!!!!!
| |
|
رحـ الله ـاب
الإدارة
عدد الرسائل : 966
العمر : 50
بتشتغل / طالب : مدرسة
دعاء :
مزاجي : 
البلد : 
الرد : 0
تاريخ التسجيل : 31/08/2007
| | موضوع: رد: @@ رباعيات صلاح جاهين كاملة @@ الجزء الثالث @ الأربعاء أغسطس 20, 2008 3:43 pm | |
| - اقتباس :
- الحلو يم اليم صابــــــــــح رايح
سارح في حضن الميه سابح سايح
الحلو داب في البحر , قلــــت أدوقه
وجدت لسه البحر برضك ماــــــلح
عجبي !!!
ايوة كلامه عن البحر صادق ومن القلب
حتى الحلا لايمكن يحلى ملحه
وعجبي ..!!
تسلم ايديك يا بحار
انا من عشاق صلاح جاهين
| |
|
shahe
الإدارة
عدد الرسائل : 1007
العمر : 44
بتشتغل / طالب : مشغول
دعاء :
مزاجي : 
البلد :
الرد : 0
تاريخ التسجيل : 29/04/2008
| | موضوع: رد: @@ رباعيات صلاح جاهين كاملة @@ الجزء الثالث @ الخميس أغسطس 21, 2008 6:39 pm | |
| حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي !!!
لا تجبر الانسان و لا تخـــــــــيره
يكفيه ما فيه من عقل بيحيــــــره
اللي النهارده بيطلبه و يشتهــــيه
هو اللي بكره ح يشتهي يغيـــــره
عجبي !!
الله يرحمه
تسلم ايديك اللى نقلت الرباعيات يا بحار
| |
|
